Nemendur í HR glíma við Parísarmarkmið og sjávarútveg

Hnakkaþon
21. janúar 2016

Hnakkaþon Háskólans í Reykjavík (HR) og Samtaka fyrirtækja í sjávarútvegi (SFS) verður haldið í annað sinn dagana 21.– 25. janúar næstkomandi. Hnakkaþonið er keppni þar sem nemendur HR reyna með sér í lausn verkefna sem tengjast íslenskum sjávarútvegi. Áskorun Hnakkaþonsins að þessu sinni varðar eitt mikilvægasta viðfangsefni samtímans, loftslagsmál, í kjölfar tímamótasamkomulags ríkja heims í París á síðasta ári. Lausnir geta t.d. snúist um markaðssetningu, hugbúnað, tækni og vörustjórnun, svo fátt eitt sé nefnt. 

Hnakkaþonið er opið öllum nemendum HR. Skráningar í keppnina þetta árið fóru fram úr björtustu vonum en 64 nemendur í 15 liðum hafa skráð sig í keppnina, úr öllum deildum háskólans. Það er til mikils að vinna því Icelandair Group og sendiráð Bandaríkjanna á Íslandi bjóða sigurliðinu á stærstu sjávarútvegssýningu N-Ameríku, í Boston, í mars.

Þá daga sem keppnin stendur yfir, vinna liðin að ákveðnu verkefni sem tengist sjávarútvegi og Parísarmarkmiðunum og fá aðstoð og ráðgjöf sérfræðinga úr íslenskum fyrirtækjum í greininni. Keppnin hefst fimmtudaginn 21. janúar kl. 14. Þá fá liðin ítarlegar upplýsingar um verkefnið og hitta sérfræðinga úr sjávarútvegsfyrirtækjum til skrafs og ráðagerða. Laugardaginn 23. janúar kl. 14-16 kynna liðin sínar niðurstöður og tillögur að lausnum. Verðlaunaafhending fyrir bestu lausnina fer fram mánudaginn 25. janúar kl. 10. Nánari upplýsingar um dagskrá er að finna á: http://www.ru.is/haskolinn/vidburdir/nr/32454

 

Dómnefnd Hnakkaþonsins 2016 skipa:

Ari Kristinn Jónsson, rektor HR

Björgólfur Jóhannsson, forstjóri Icelandair

Gylfi Sigfússon, forstjóri Eimskips

Þóranna Jónsdóttir, forseti viðskiptadeildar HR

Árni Finnsson, formaður Náttúruverndarsamtaka Íslands

Sólveig Arna Jóhannesdóttir, sölustjóri ferskfisksafurða HB Granda

Heiðar Hrafn Eiríksson, skrifstofustjóri Þorbjarnar

Ketill Berg Magnússon, framkvæmdastjóri FESTU, Miðstöðvar um samfélagsábyrgð fyrirtækja  

Karen Kjartansdóttir, samskiptastjóri SFS

Íslenskur sjávarútvegur er margþætt atvinnugrein sem kallar á mikla þekkingu og sérhæft starfsfólk. Meðal viðfangsefna hans eru fiskveiðar, matvælavinnsla, markaðssetning, nýsköpun og tækniþróun, flutningar, rannsóknir, umhverfismál og margt fleira. Markmið með Hnakkaþoninu er að kynna þau ótalmörgu tækifæri til nýsköpunar og fjölbreyttu störf sem íslenskur sjávarútvegur býður upp á og kalla fram nýjar og frískar hugmyndir frá nemendum HR. Þá er eitt af meginmarkmiðum Hnakkaþonsins að minna nemendur á að arðbærni og góð umgengni um náttúruna verða að fara saman ef atvinnustarfsemi á að vera sjálfbær.

Hnakkaþonið er einnig liður í áherslu Háskólans í Reykjavík á raunhæf verkefni í námi, í samvinnu við íslenskt atvinnulíf.

 

Nánari upplýsingar veitir:

Eiríkur Sigurðsson, forstöðumaður markaðs- og samskiptasviðs hjá HR í síma 859 5117, netfang eirikursig@hr.is


Markmið með Hnakkaþoninu er að kynna þau ótalmörgu tækifæri til nýsköpunar og fjölbreyttu störf sem íslenskur sjávarútvegur býður upp á og kalla fram nýjar og frískar hugmyndir frá nemendum HR. Þá er eitt af meginmarkmiðum Hnakkaþonsins að minna nemendur á að arðbærni og góð umgengni um náttúruna verða að fara saman ef atvinnustarfsemi á að vera sjálfbær.

Viðburðir