Fundur um þýska matvælamarkaðinn

24. maí 2016

Við vekjum athygli á fundi sem haldinn verður miðvikudaginn 25. maí nk. kl. 14-16 um þýska matvælamarkaðinn, með áherslu á sjávarafurðir. Fundurinn verður á Bryggjunni brugghúsi, Grandagarði 8, Reykjavík. Gefið verður yfirlit yfir útflutning matvæla til Þýskalands, þróun, einkenni markaðarins, tækifæri, kröfur og markaðshorfur. 

Dr. Matthias Keller framkvæmdastjóri helstu samtaka í fiskiðnaði og upplýsingamiðstöðvar sjávarafurða flytur aðal erindi fundarins. Hann mun fjalla um neysluvenjur á sjávarafurðum í Þýskalandi, kröfur markaðarins þegar kemur að innkaupavenjum, aðgengi upplýsinga, gæðum og ábyrgum fiskveiðum. 

Björgvin Þór Björgvinsson verkefnastjóri hjá Íslandsstofu fjallar um útflutning frá Íslandi, hvaða afurðir eru fluttar út og þróun síðustu ára.

Ruth Bobrich viðskiptafulltrúi í sendiráðinu í Berlín fjallar almennt um þýska markaðinn og ný tækifæri út frá neysluvenjum Þjóðverja. Meðal annars mun hún fjalla um lífræna markaðinn og segir frá matvælasýningunni ANUGA sem haldin er annað hvort ár í Köln í Þýskalandi og Biofach í Nürnberg. Jafnframt mun hún kynna þjónustu viðskiptafulltrúans og sendiráðsins við fyrirtæki sem hafa áhuga á þýska markaðinum.

Þá munu fulltrúar fyrirtækja sem flytja út sjávarafurðir og önnur matvæli, segja frá reynslu sinni af þýska markaðinum, m.a. Óskar Sigmundsson sem á og rekur fyrirtækið Marós í Cuxhaven í Þýskalandi og Snorri Jónsson hjá Reykjavík Distillery.

Aðgangur er ókeypis en nauðsynlegt er að skrá sig fyrirfram á vef Íslandsstofu. Boðið verður upp á léttar veitingar í lok fundar.

Nánari upplýsingar um fundinn veita Björgvin Þór Björgvinsson, bjorgvin@islandsstofa.is og Guðný Káradóttir, gudny@islandsstofa.is, í síma 511 4000. 

Viðburðir