Rangfærslur í kjaraumræðu

Ekki er hægt að taka því þegjandi þegar fjöldi fólks og fyrirtækja eru borin þungum sökum án frekari skýringa
19. október 2016

Heiðrún Lind, framkvæmdastjóri SFS, segir ekki hægt að taka því þegjandi þegar fjöldi fólks og fyrirtækja eru borin þungum sökum án frekari skýringa.

Í kjölfar þess að félagsmenn í VM Félagi vélstjóra og málmtæknimanna samþykktu boðun verkfalls, sem að óbreyttu hefst 10. nóvember næstkomandi, skrifar Guðmundur Ragnarsson formaður félagsins eftirfarandi á heimasíðu þess.

„….Síðan held ég að pólitíkin ætti að hysja upp um sig buxurnar og gefa gaum að kröfum sjómanna um verðmyndun á fiski og að rétt afurðarverð sé að skila sér til landsins. Við þurfum að fá að sjá það svo hægt sé að uppfylla núgildandi kjarasamninga.“

Með þessum orðum er félagsmönnum í SFS gefið að sök að rétt afurðaverð skili sér ekki til landsins og að gildandi kjarasamningar séu því ekki virtir.

Það alvarlegt mál að gefa mönnum að sök að svindla á kjarasamningum og hlunnfara þannig starfsfólk sitt. Það er ekki hægt að taka því þegjandi þegar mikill fjöldi fólks og fyrirtækja eru borin þungum sökum án frekari skýringa eða rökstuðnings. Ef einstök dæmi eru til um sannanir fyrir slíkum ásökunum þá eru menn hvattir til að koma slíkum ábendingum áleiðis en láta það vera að ásaka heila starfsgrein um óheilindi.

Verðlagsstofa skiptaverðs starfar samkvæmt lögum nr. 13/1998 og hefur opinbert eftirlit með því að útgerðir geri rétt upp við sjómenn. Í 5. gr. fyrrnefndra laga segir:

„Við athugun einstakra mála getur Verðlagsstofa krafið sjómenn, útgerðir, kaupendur afla, flutningsaðila, fiskmarkaði, umboðsmenn og aðra þá sem milligöngu hafa um sölu á afla um allar nauðsynlegar upplýsingar.“

Þó gildistími kjarasamnings á milli VM Félags vélstjóra og málmtæknimanna og Samtaka fyrirtækja í sjávarútvegi hafi runnið út hinn 1. janúar 2011 þá hefur verið við hann miðað til þessa dags. Þeim sem telur að unnið sé í andstöðu við gerðan samning er því hægt um vik að koma ábendingum á framfæri til viðeigandi aðila.

Viðburðir