„Wild Icelandic Cod“ vinnur Hnakkaþonið 2017

Hugmyndir neytendapakkningar fyrir íslenskan fisk á Bandaríkjamarkaði
23. janúar 2017

Vísir í Grindavík mun nota nýjar, umhverfisvænar neytendapakkningar fyrir íslenskan fisk á Bandaríkjamarkaði, nái vinningstillögur í Hnakkaþoni HR og SFS, útflutningskeppni sjávarútvegsins, fram að ganga. Úrslit keppninnar voru kynnt í gær. Sigurliðið skipa nemendur í fjármálaverkfræði og viðskiptafræði, þeir Bjarki Þór Friðleifsson, Fannar Örn Arnarsson, Jóhannes Hilmarsson, Ómar Sindri Jóhannsson og Sigurður Guðmundsson. Hópurinn mun heimsækja Seafood Expo North America, stærstu sjávarútvegssýningu N-Ameríku í Boston í mars, í boði Icelandair Group og sendiráðs Bandaríkjanna á Íslandi.

Úrlausn þeirra bar titilinn „Wild Icelandic Cod“ og fólst í hönnun nýrra neytendapakkninga til að auðvelda Vísi að selja ferskan fisk beint á Bandaríkjamarkað. Umbúðirnar leggja áherslu á ferskleika, gæði, umhverfisvernd og sögu Vísis en innihalda líka einfaldar uppskriftir, sem henta meðvituðum neytendum í nútímasamfélagi. Einnig benti liðið á kosti þess að nota umhverfisvæna pappakassa í stað hinna hefðbundnu frauðplastkassa í flutningum á ferskum fiski. Pappakassarnir eru ódýrari, fyrirferðarminni og taka mun minna pláss í flutningum.

Í Hnakkaþoninu reyna nemendur HR með sér í lausn verkefna sem tengjast íslenskum sjávarútvegi. Í áskorun Hnakkaþonsins að þessu sinni unnu nemendur með Vísi í Grindavík, Marel og prentsmiðjunni Odda að því að móta tillögur um hvernig Vísir geti aukið fullvinnslu og pökkun á ferskfiski á Íslandi, með aukinni áherslu á neytendapakkningar og áttu að vega kostnað og ávinning slíkra breytinga. Fimm lið skiluðu inn fjölbreyttum tillögum.

Ari Kristinn Jónsson, rektor HR, sagði við verðlaunaafhendinguna að liðin hafi skilað góðum tillögum sem hafi vakið athygli samstarfsfyrirtækjanna. „Viðfangsefni keppninnar í þetta sinn var að setja fram ítarlegar tillögur um hvernig þróa mætti vinnslu og pökkun á fiski hjá Vísi þannig að enn betur væri mætt þörfum neytenda fyrir vandaðar og hentugar pakkningar, á sama tíma og fullt tillit væri tekið til bæði kostnaðar, sjálfbærni og umhverfisáhrifa. Það er afskaplega krefjandi að setja fram nýjar og gagnlegar hugmyndir, þar sem tekið er tillit til allra mögulega áhrifa þeirra. Liðin leystu þetta öll mjög vel og því var það alls ekki auðvelt fyrir dómnefnd að velja sigurvegara. En dómnefndin leysti sitt hlutverk vel og fagmannlega, og skilaði á endanum samhljóða niðurstöðu.“

Erla Ósk Pétursdóttir, gæða- og þróunarstjóri Vísis í Grindavík sagði það hafa verið virkilega fróðlegt að heyra mismunandi hugmyndir um hvernig umhverfisvænar framtíðarumbúðir geti litið út. „Það var magnað hvað krakkarnir náðu að gera margt á stuttum tíma og liðin unnu frábæra vinnu í að benda á ný tækifæri fyrir Vísi. Þau náðu að kynnast starfsemi fyrirtækisins vel á stuttum tíma og bentu á frábær tækifæri til sóknar í umhverfis- og markaðsmálum.“

Þá segir Erla áherslu HR á að vera í sterkum tengslum við atvinnulífið ekki síður mikilvæga fyrir fyrirtæki í sjávarútvegi. „Við viljum fá gott, menntað fólk til starfa og viljum að hæfir einstaklingar sjái störf í sjávarútvegi sem spennandi framtíðarstörf.“

Í dómnefnd Hnakkaþons 2017 sátu:

Ari Kristinn Jónsson, rektor HR
Árni Finnsson, formaður Náttúruverndarsamtaka Íslands
Bjarni Guðjónsson, sölustjóri sjávarútvegs hjá Odda
Erla Ósk Pétursdóttir, gæða- og þróunarstjóri Vísis
Gylfi Sigfússon, forstjóri Eimskips
Gunnar Már Sigurfinnsson, framkvæmdastjóri Icelandair Cargo
Hallur Þór Sigurðarson, aðjúnkt við viðskiptadeild HR
Hrefna Sigríður Briem, forstöðumaður B.Sc. náms við viðskipta- og hagfræðideild HR
Karen Kjartansdóttir, samskiptastjóri SFS
Pálmi Jónsson, framkvæmdastjóri Blámar

 

 

 

 

Íslenskur sjávarútvegur er margþætt atvinnugrein sem kallar á mikla þekkingu og sérhæft starfsfólk. Meðal viðfangsefna hans eru fiskveiðar, matvælavinnsla, markaðssetning, nýsköpun og tækniþróun, flutningar, rannsóknir, umhverfismál og margt fleira. Markmið með Hnakkaþoninu er að kynna þau ótalmörgu tækifæri til nýsköpunar og fjölbreyttu störf sem íslenskur sjávarútvegur býður upp á og kalla fram nýjar og frískar hugmyndir frá nemendum HR. Þá er eitt af meginmarkmiðum Hnakkaþonsins að minna nemendur á að arðbærni og góð umgengni um náttúruna verða að fara saman ef atvinnustarfsemi á að vera sjálfbær.

Hnakkaþonið er einnig liður í áherslu Háskólans í Reykjavík á raunhæf verkefni í námi, í samvinnu við íslenskt atvinnulíf. 

Viðburðir